Kundër vendimit të gjykatës së shkallës së parë palët mund të bëjnë ankesë në Gjykatën e Apelit në Prishtinë brenda 15 ditësh nga dita e dorëzimit të kopjes së aktgjykimit. Ankesa e personit të autorizuar e paraqitur brenda afatit të caktuar e pezullon ekzekutimin e aktgjykimit.

Gjykata e Apelit mbasi shqyrton ankesën, mund të vendosë:

• E hedh ankesën si të palejueshme;
• E refuzon ankesën si të pabazë dhe e vërteton aktgjykimin e gjykatës themelore;
• E anulon aktgjykimin e gjykatës themelore dhe e kthen çështjen në rigjykim dhe rivendosje.

Ankesë kundër aktgjykimit të Gjykatës së Apelit mund të paraqitet në Gjykatën Supreme të Kosovës në rastin kur:

1. Gjykata e Apelit e ndryshon aktgjykimin lirues të gjykatës themelore dhe e zëvendëson me aktgjykim dënues për të akuzuarin ose
2. Kur me aktgjykimin e Gjykatës Themelore, ose Gjykatës së Apelit, i është shqiptuar dënimi me burg të përjetshëm.

Kundër vendimit të Gjykatës së Apelit, palët mund të parashtrojnë mjetet e jashtëzakonshme në Gjykatën Supreme të Kosovës.

Mjetet e jashtëzakonshme në procedurë penale janë:

• rishikimi e procedurës penale;
• kërkesa për zbutjen e jashtëzakonshme të dënimit;
• kërkesa për mbrojtjen e ligjshmërisë.